مڵەجۆری كردنی یەكتر لەنێو خۆماندا تائێستا كۆتایی نەهاتووە!!

نووسینی: چنار عیزەدین ///

 

مڵەجۆری یان رقەبەری لەنێوان تاكەكانی كۆمەڵگە لە دۆخی ئێستادا نزیك دەبێتەوە لە بوون بە دیاردە، كاتێكیش مڵەجۆری دەبێتە دیاردە ئەوا مەترسییەكی زۆر گەورەی بەسەر كۆمەڵگە و ئاسایشی كۆمەڵایەتی هەیە.
لەنێو كۆمەڵگەی كوردەواری خۆماندا رۆژانە لە میدیاكان و تۆڕە كۆمەڵایەتییەكان بەتایبەتی شت گەلێكی نامۆ بە پێكەوە ژیان دەبینین كە هەموویان دەچنە خانەی مڵەجۆری بەرانبەر بە یەكتری، هەڵبەتە ئەمەش دیاردەیەكی ناشرین و قێزەونە. بەداخەوە هیچ هەوڵێك بۆ بەرەنگاربوونەوەی ئەو گوتاری رقەبەرییە دركی پێ ناكرێت، یان ئەگەر هەبن ئەوا زۆر كرچ و كاڵە، ئەمەش وایكردووە وردە وردە پەرە بەو گوتارە بدرێت و ببێتە دیاردەیەكی زۆر ناشرین.

بێگومان گوتاری رقەبەری پرسێكی جیهانییە، بەڵام دەبێت ئێمە لە ئاستی كۆمەڵگەی كوردەواری بەتایبەت لە شاری هەولێر كار بكەین بۆ بەرەنگاربوونەوەی. وەك دەزانن لە هەولێر جگە لە كورد، ئەوا پێكهاتەی توركمان و مەسیحی بوونیان هەیە و زمان و ئاخاوتنی تایبەت بە خۆیان هەیە، بۆیە ئاساییە ئەگەر هەمووان لە زمانی توركمانی مەسیحی تێ نەگەن، كەسیش كوردەكانی ناچار نەكردووە دەبێت فێری ئەو زمانانە ببن بەڵام ناكرێت گاڵتە و سوكایەتی بە بەرانبەرەكەت بكەیت لەسەر شێوە و دەربڕینەكانی كاتێك هەوڵ و كۆششێكی كردووە بۆ فێربوونی زمانی كوردی، بە پێچەوانەوە دەبێت جێی دەستخۆشی و هاندان بێت كاتێك توركمانەكان یان مەسیحییەكان هەوڵدەدەن فێری زمانی كوردی ببن.
بەشبەحاڵی خۆم وەك توركمانێك شانازی بە زمانی خۆم دەكەن، رێز و حورمەتیشم بۆ زمانی كوردی هەیە و هەوڵمداوە زۆر باش قسەی پێ بكەن و پێی بنووسم، بەگشتی توركمانەكانی هەولێر كوردی زۆر باش دەزانن قسەی پێ بكەن و پێی بنووسن، لەمەشدا هیچ گرفتێكمان نیە، بەڵام هەندێك دەستەواژە هەن دەدرێنە پاڵ توركمانەكان ئەگەر راستیش بن ئەوا دەربڕینەكەی دەچێتە خانەی رەگەزپەرستی و گوتاری رقەبەری، لەوانە (توركمانەكان ترسنۆكن، ئەمن دەچم ماڵ نان دەخۆم، هەولێری بە مریشكە ڕەشەی ناوێری، مۆنیكای توركمانان، ئەتۆ دەعوەت لە ماڵ ئێمە..) ئەم سوكایەتی و گاڵتە كردنە دوورن لە نەریتی كۆمەڵایەتی كوردەواری و دەچێتە قالبی رەگەزپەرستی، بەڵام رۆژانە بەرانبەر بە توركمانەكان بەكار دەهێندرێن بەتایبەت لە تۆڕە كۆمەڵایەتییەكان.
خاڵێكی تر كە جێی سەرنجە ئێمە وەك پێویست نەمانتوانیوە سوود لەو هەموو پێشكەوتن و تەكنەلۆژیایە وەرگرین، لە كاتێكدا گوتاری مڵەجۆری لەنێو سۆشیال میدیای كوردی زۆر بە زەقی هەیە و تەرویجیشی بۆ دەكرێت و كەسانێكی نا رۆشنبیر بۆ گاڵتە و فشە پێ كردن بە توركمانەكان ئەو دەستەواژانەی سەرەوە بڵاودەكەنەوە، جێی داخە كە توێژی رۆشنبیرانیش خۆیان لەو پرسە هەستیارەدا نەبان كردووە، قسەیەكیان نیە، كە ئەمە ئەركی ئەوانە كۆمەڵگە هۆشیار بكەنەوە و روونی بكەنەوە كە گوتاری رقەبەری چەندە مەترسیدارە بەسەر ئایندەی ئاسایشی كۆمەڵایەتی.